Qëllimi i Samitit të Triestes – Rritja e investimeve dhe hapja e 80 mijë vende pune deri në 2025, Entela Barjamaj/SCAN, 25 Maj 2017

Ministri Bushati mori pjesë në takimin përgatitor të Samitit të Ballkanit Perëndimor, i cili do të mbahet në Trieste më 12 korrik të këtij viti. Samiti i Triestes ka si qëllim që të afrojë më tej vendet e rajonit me Bashkimin Europian, përmes konkretizimit të angazhimeve të marra në Samitet e mëparshme, sidomos për sa i përket projekteve infrastrukturore dhe energjetike, por edhe duke skicuar instrumente të reja për zhvillimin ekonomik të rajonit.

“Është e nevojshme që të gjitha vendet pjesëmarrëse të kontribuojnë për të konsoliduar arritjet e Procesit të Berlinit si nga pikëpamja e dialogut politik ashtu edhe nga ajo e zbatimit të projekteve të ndërlidhjes në transport dhe energji”, deklaroi Bushati.

Ministri Bushati përshëndeti përkushtimin e palës italiane për mbarëvajtjen e Samitit si dhe mirëpriti propozimet novatore të kryesisë italiane në përgatitjen e masave konkrete në fushën e inovacionit dhe zhvillimit të kompanive të vogla dhe të mesme në rajon.

“Kjo qasje pragmatiste është e vetmja që mund të rrisë aftësinë e rajonit për të qenë më konkurrues dhe për të thithur investime, duke sjellë zhvillim dhe punësim”, u shpreh Bushati.

Aktualisht, Komisioni Europian po punon mbi një plan masash për lëvizjen e lirë të punonjësve, rritjen e investimeve dhe lehtësimin e tregtisë në rajon, duke synuar krijimin e rreth 80 mijë vendeve të reja pune deri në vitin 2025. Pritet që ky plan masash dhe instrumentet financiarë përkatës të propozohen gjatë Samitit të Triestes në muajin korrik.

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.